Нэг: Нийтлэг үндэслэл

1.1 Орон нутгийн Хурлын сонгуульд нам, эвслээс нэр дэвшигч болон бие даан нэр дэвшигчдэд /цаашид “нэр дэвшигч” гэх/ хөрөнгө, орлогын мэдүүлгээ /цаашид “ХОМ” гэх/ хуульд заасан хугацаанд аймаг, нийслэл, сум, дүүргийн сонгуулийн хороонд гаргаж өгөх үйл ажиллагаанд дэмжлэг үзүүлэхэд энэхүү зөвлөмжийн зорилго оршино.

1.2 Орон нутгийн Хурлын сонгуульд нэр дэвшигч нь аймаг, нийслэл, сум, дүүргийн сонгуулийн хороонд бүртгүүлэхдээ хуульд заасан бусад баримт бичгийн хамт ХОМ-ээ гаргаж өгнө.  

Хоёр: Хөрөнгө, орлогын мэдүүлэг гаргах

2.1 Нэр дэвшүүлсэн нам, эвсэл нь нэр дэвшүүлэх ажиллагаа дууссанаас хойш гурав хоногийн хугацаанд багтаан нэр дэвшигчийн ХОМ-ийг хуульд заасан баримт бичгийн хамт аймаг, нийслэл, сум, дүүргийн сонгуулийн хороонд ирүүлнэ.

2.2 Бие даан нэр дэвшигч нь нэр дэвшүүлэх ажиллагаа дууссанаас хойш гурав хоногийн хугацаанд багтаан өөрийн ХОМ-ээ, хуульд заасан баримт бичгийн хамт аймаг, нийслэл, сум, дүүргийн сонгуулийн хороонд ирүүлнэ.

2.3 Нэр дэвшигч ХОМ-ээ УИХ-ын 2007 оны 9-р тогтоолын 1-р хавсралтаар батлагдсан ХОМ-ийн маягтын дагуу мэдүүлнэ. /Сонгуулийн ерөнхий хорооны 2008.09.12-ны өдрийн 64-р тогтоол/

2.4 Нэр дэвшигч ХОМ-ийн маягтын “Орлого” хэсгийн “урьд мэдүүлсэн”, “тайлангийн үед орсон өөрчлөлт” гэсэн хүснэгтэнд орлогоо мэдүүлэхгүй, харин “одоо байгаа” гэсэн хүснэгтэнд орлогоо мэдүүлнэ.

2.5 Нэр дэвшигч өөрийн болон гэр бүлийн гишүүдийн хөрөнгө, орлогоо аймаг, нийслэл, сум дүүргийн сонгуулийн хороонд бүртгүүлэх хүртэлх үеийн байдлаар мэдүүлнэ.

2.6 Нэр дэвшигч урьд нь Авлигын эсрэг хуулийн үйлчлэлд хамааран ХОМ-ээ гаргаж байсан бол аймаг, нийслэл, сум, дүүргийн сонгуулийн хороонд бүртгүүлэхдээ нэр дэвшигчийн хувиар мэдүүлгээ шинээр гаргана.

2.7 Нэр дэвшигч хөрөнгө, орлогынхоо талаар мэдүүлэхдээ үнийн дүнг зөвхөн төгрөгөөр илэрхийлж бичнэ.

2.8 Нэр дэвшигч өөрийн болон гэр бүлийн гишүүдийн өмчлөл, эзэмшилд байхгүй хөрөнгө, орлогыг ХОМ-ын маягтыг бөглөхдөө “байхгүй” гэж заавал бичиж тэмдэглэнэ.

2.9 ХОМ-ийн талаар болон шаардлагатай маягт, заавар зөвлөмжийн тухай Авлигатай тэмцэх газрын www.iaac.mn вэб сайтнаас тодорхой мэдээлэл авч болно.

Гурав: Хөрөнгө, орлогын мэдүүлэг гаргагчийн үүрэг

3.1 Хуульд заасан хугацаанд ХОМ-ээ гаргаж бүртгүүлнэ. /Орон нутгийн Хурлын сонгуулийн тухай хуулийн 25 дугаар зүйлийн 25.2, 25.3-д заасан хугацаанд/

3.2 Үнэн, зөв мэдүүлэх /Авлигын эсрэг хуулийн 10.2-т зааснаар мэдүүлэг гаргагч хөрөнгө, орлогын мэдүүлгээ өөрөө үнэн зөв гаргах үүрэгтэй./

3.3  Эх үүсвэрийн талаар тодорхой тайлбар хийх /Авлигын эсрэг хуулийн 13 дугаар зүйлийн 13.4-д зааснаар мэдүүлэгч этгээд хөрөнгө, орлогын мэдүүлгээ хугацаанд нь гаргаж өгөөгүй, эсхүл эх үүсвэрийг нь заагаагүй буюу түүнийг хэрхэн олсон талаар тайлбар өгч чадаагүй бол Авлигатай тэмцэх газар тухайн мэдүүлэг гаргагчийн хөрөнгө, орлогын мэдүүлгийг шалгана./

3.4 Батлагдсан маягтын дагуу асуулт болгонд хариулах /Хөрөнгө, орлогын мэдүүлгийн маягт-ыг Улсын Их Хурлын 2007 оны 9 дүгээр тогтоолын 1 дүгээр хавсралтаар баталсан./

3.5 Засваргүй, товч тодорхой бичих /Хөрөнгө, орлогын мэдүүлгийн маягтыг бөглөхдөө утга, агуулгыг тодорхой, үнийн дүнг засваргүй, гаргацтай бичнэ./

3.6 Хөрөнгө, орлогын мэдүүлгийн маягтын хуудас болгон дээр гарын үсэг зурж баталгаажуулна.

                                                 АВЛИГАТАЙ ТЭМЦЭХ ГАЗАР